Şu gün türkmen dzýudoçysy Maýsa Pardaýewa Pariždäki Olimpiýa oýunlarynda ilkinji gezek çykyş etdi. Ol ýaryşlaryň birinji tapgyrynda halkara ýaryşlarynyň bürünç medalynyň eýesi hytaýly Saý Siden üstün çykdy. Ýöne 1/8 finalda Pardaýewa dünýä reýtinginde dördünji orny eýeleýän braziliýaly dzýudoçy Rafaela Silwadan ýeňildi.
Bu türkmen dzýudoçylarynyň braziliýaly türgenlerden yzygider ikinji gezek ýeňilmegi boldy. Düýn 66 kg çenli agram derejesinde Serdar Rahymow hem 1/8 finalda Braziliýanyň wekili Willian Limadan ýeňildi. Netijede, Lima finala çykdy we ýaponiýaly Hifumi Abeden ýeňlip, Oýunlaryň kümüş medalynyň eýesi boldy.
Türkmen ýüzüjisi Aýnura Primowa hem Olimpiadadaky çykyşyny tamamlady. Ol 100 metr aralyga arkanlygyna kwalifikasion ýüzüşde 1:10.17 netijäni görkezip, ýarym finala çykyp bilmedi.
Olimpiadanyň 17 ýaşly gatnaşyjysy umumy sanawda 35-nji orny eýeledi.
