Fransuz alymlary iň gadymy müsür piramidalarynyň içinde saklanyp galan piramida bolan Joseri gurmak üçin ýörite gidrawliki liftiň ulanylan bolmagy mümkin diýip çaklaýarlar. Ol takmynan b.e. öňki 2680-nji ýylda gurlupdyr.
Ksawýe Landronyň ýolbaşçylygyndaky barlagçylar piramidanyň töweregindäki landşafty öwrenip, gadymy gurluşykçylaryň daşlary götermek üçin kanallaryň ulgamyny we dik şahtany ulanyp biljekdiklerine göz ýetirdiler. Kanallaryň suwy şahta düşüp, birbada 100 tonna daşy götermäge ukyply ýüzýän agaç lifti ýokary galdyryp bilen bolmaly.
Bu çaklama gidrologiki we geologiki maglumatlaryň seljermesine, şeýle hem alymlaryň pikirine görä, kanallarda suwuň derejesini kadalaşdyrmak üçin bent bolup hyzmat eden Gisr-el-Mudir desgasyny öwrenmeklige esaslanýar.
Şeýle-de bolsa, käbir müsürliler beýleki piramidalarda şuňa meňzeş tehnologiýanyň ulanylandygynyň subutnamasynyň ýoklugyna salgylanyp, täze çaklama şübheli garaýarlar. Gurluşygyň dowamynda piramidanyň görnüşini üýtgetmek üçin gidrawliki liftiň nähili ulanylyp bilinjekdigi hem düşnüksizligine galýar.
Öňden gelýän ynançlara görä, müsürliler piramidalaryň gurluşygynyň gidýän ýeriniň golaý-goltumyndan gazylyp alnan ýumşak hek daşyndan agyr bölekleri kesip alypdyrlar. Soňra, daş döwülýän ýerlerden taýýar elementleri ýörite galdyryjylaryň kömegi bilen (daşlar derýanyň aňyrsyna gämilerde daşalypdyr) äkidipdirler we gysga pürslerden ýasalan ýörite platformalaryň kömegi bilen beýiklige çykarylypdyr. Bloklar biri-birine ýörite ergin bilen seplenipdir.
