Türkiýäniň häkimiýetleri ýylda, takmynan, 1 mln elektromobil öndürmegi meýilleşdirýärler. Bu barada respublikanyň Prezidenti Rejep Taýyp Ärdogan habar berdi diýip, TASS belleýär.
“Biz 5 milliard dollarlyk elektromobil önümçiligini höweslendirmek boýunça çäreler toplumyny işe girizýäris, olaryň önümçiligini ýylda 1 mln birlige ýetirmek meýilleşdirilýär” – diýip, TRT Haber Ärdoganyň sözlerini getirýär.
Ol iýul aýynyň başynda Türkiýäniň dünýäde iň uly elektromobil öndürijileriniň biri bolan BYD hytaý kompaniýasy bilen 1 mlrd dollardan gowrak bahaly şertnama baglaşandygyny ýatlap geçdi. Prezident beýleki kompaniýalar bilen gepleşikleriň dowam etdirilýändigini hem belledi.
BYD bilen şertnama Türkiýede ýylda 150 müň elektrokar we gibrid awtoulag öndürýän zawodyň açylmagyny göz öňünde tutýar.
Türkiýe dürli görnüşlerde Togg elektromobilini çykarýar. Ilkinji gezek ol 2019-njy ýylda tanyşdyryldy, elektrokarlar ýurduň günbataryndaky Bursa welaýatynda ýygnalýar. Öň, zawodyň kuwwatynyň ýylda 170 – 175 müň birlik üçin niýetlenendigi habar berildi. Türk häkimiýetleri ýedi ýylyň içinde, takmynan, bir million elektromobil çykarmak meýilnamasy barada habar berdiler.
