23-nji iýulda Türkmenistanyň Mejlisiniň Başlygy D.Gulmanowa Birleşen Milletler Guramasynyň Çagalar gaznasynyň (ÝUNISEF) wekilhanasynyň Türkmenistanda täze bellenen ýolbaşçysy hanym Jalpa Ratna bilen duşuşdy.
Milli Parlamentiň Başlygy myhmany BMG-niň Çagalar gaznasynyň wekilhanasynyň ýolbaşçysy wezipesine bellenilmegi bilen gutlap, ikitaraplaýyn hyzmatdaşlygy kämilleşdirmekde üstünlikleri arzuw etdi.
Duşuşygyň dowamynda myhman ýurdumyzyň içeri we daşary syýasatynyň esasy ugurlary, milli Parlamentiň düzümi hem-de dürli ulgamlarda amala aşyrylýan özgertmeleri kanunçylyk taýdan üpjün etmek boýunça alnyp barylýan işler bilen tanyşdyryldy. Şunuň bilen baglylykda, taraplar Türkmenistanyň BMG-niň Çagalar gaznasynyň wekilhanasy bilen hyzmatdaşlygynyň netijelerine ýokary baha berdiler. Şeýle hem, köp ýyllyk oňyn hyzmatdaşlygy ösdürmegiň mümkinçilikleri barada pikir alyşdylar.
Söhbetdeşligiň barşynda ýurdumyzda çagalara hemaýat bermek boýunça Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň işine, şeýle hem ýurdumyzda alnyp barylýan bilelikdäki meýilnamalaýyn işlere aýratyn üns berildi.
