Nike "Ýeňiş hemmeler üçin däl" atly täze mahabat kampaniýasyna başlady. Ol Pariždäki Olimpiýa oýunlaryna bagyşlanýar.
Kampaniýa sportuň dürli görnüşlerini we türgenleri görkezýär. Olaryň hatarynda Lebron Jeýms, Kobi Braýant, Killian Mbappe, Kriştianu Ronaldu, Ýannis Adetokunbo, Serena Uilýams, Şa'Karri Riçardson, Sofiýa Smit, Bebe Wio, Sinwen Çžen, Ýakob Ingebrijtsen, Eýža Uilson, Ikshelt Gonsales, Wiktor Wembanýama, Sabrina Ionesku we Eluid Kipçoge dagylar bar.
Wideorolikde sportuň we ýeňiş gazanmaga bolan islegiň dürli gatlaklardan bolan adamlary nähili ruhlandyrýandygy görkezilýär. Nike-yň marketing bölüminiň müdiri Nikol Hubbard Grem bu kampaniýanyň diňe bir mahabat bolman, eýsem, türgenleri we olaryň isleglerin goldamakdygyny nygtady.
“Bu türgenleriň münbere çykmak üçin edýän gurbanlary, tutanýerliligi we erjelligi baradaky hekaýat. Entek döredilmeli miras we hasyl boljak arzuwlar. Bu ýeňşe bolan islegde hiç hili erbetligiň ýokdugyny dünýä ýatladýar "- diýip, ol belledi.
