NASA amerikan kosmos gullugy SpaceX bilen 2031-nji ýylda Halkara kosmos stansiýasyny (ISS) orbitadan çykarmak barada şertnama baglaşandygyny ozal habar beripdik. Ilon Maskyň kompaniýasynyň bu meseläni nädip çözjekdigi belli boldy.
Bu wezipäni ýerine ýetirmek üçin SpaceX Dragon ýük gämisini, adaty 18-e derek 46 hereketlendiriji oturdyp, üýtgeder.
NASA-nyň berýän habaryna görä, HKS-ny orbitadan Russiýanyň “Progress” ýük gämileriniň kömegi bilen çykarmak gaty töwekgelçilikli we netijesiz bolardy. Hereketlendirijileri we ýangyjy (16 tonna) artdyrylan Dragon stansiýanyň orbital beýikligini kem-kemden peseldip, ýylyň dowamynda ony togtadar.
Dragon-yň modifikasiýasy gäminiň gurluşyna düýpli üýtgeşmeler girizmegi, şol sanda hyzmat ediş bölümini uzaltmagy talap eder. Şeýle agyr gämini orbita çykarmak üçin Falcon 9-danam has güýçli raketa, belki-de Falcon Heavy ýa-da Starship gerek bolar.
NASA-nyň hasaplamalaryna görä, HKS-nyň agramly bölegi atmosferada ýanyp gider, uly bölekleri Ýeriň ýüzüne hem gelip biler. Şonuň üçin hem stansiýany aýyrmak wezipesi uzak wagt alar we gymmat düşer.
Käbir bilermenler şeýle çylşyrymly we gymmat missiýanyň zerurdygyna şübhelenip, 1979-njy ýylda ýörite gämileri ulanman, “Skaýleb” orbital stansiýasynyň aýrylyşynyň üstünlikli tejribesini mysal getirýärler.
