Disney kompaniýasynyň ýolbaşçysy Bob Aýger we onuň aýaly Willou Beý “Enjel Siti” zenan futbol klubunyň täze eýeleri bolarlar. Bu barada Milli zenanlar futbol ligasynda (NWSL) çykyş edýän Los-Anjelesden bolan toparyň saýtynda habar berilýär diýip, RBK ýazýar.
Aýger bilen Beý 250 mln dollara paýnamalaryň gözegçilik bukjasyny satyn alar, bu hem “Enjel Sitini” dünýäde iň gymmat zenan sport toparyna öwrer. Şertnama tamamlanandan soň, Beý klubuň müdirler geňeşiniň düzümine girer we oňa doly gözegçiligi ele alar. Şeýle-de, Beý we Aýger kluba goşmaça 50 mln dollar maýa goýar.
Öňki rekord mart aýynda Levine Leichtman Capital Partners tarapyndan 120 mln dollara satyn alnan NWSL-iň “San-Diego Ueýw” klubuna degişlidi.
“Enjel Siti” 2020-nji ýylda aktrisa Natali Portman, wençur kapitalçysy Kara Nortman we telekeçi Juli Urman tarapyndan esaslandyryldy. Reddit-iň esaslandyryjysy we tennisçi Serena Uilýamsyň ýoldaşy Aleksis Oganýan klubuň dolandyryjy eýesi boldy. Şertnama ýapylandan soň, Portman, Urman we Oganýan müdirler geňeşine girmegini dowam etdirerler.
Geçen möwsümde “Enjel Siti” pleý-offuň 1/4 finalynda utulyp, NWSL-de bäşinji orny eýeledi.
