Microsoft kompaniýasy CrowdStrike programma üpjünçiliginiň täzelenmegi bilen ýüze çykan global PK näsazlygynyň netijelerini düzetmek üçin Recovery Tool resmi guralyny çykardy diýip, 3Dnews habar berýär.
Bu gural näsazlygy düzetmek işini has aňsatlaşdyrmaga we çaltlaşdyrmaga gönükdirilendir. Ol çykmazdan ozal, el gatyşygyny talap edýän ädimleýin gollanma bardy we ol, aýratynam, ýüzlerçe ýa-da müňlerçe zyýan çeken gurluşlary bolan guramalarda köp wagt alýardy.
Recovery Tool guralyny ulanmak üçin kompaniýa jikme-jik görkezmeleri we zerur şertleriň sanawyny hödürledi. Mysal üçin, zyýan çeken kompýuterde azyndan 8 Gbaýt boş ýer, administrator hukuklary, BitLocker dikeldiş açary (şifrlenen kompýuterler üçin) we azyndan 1 Gbaýt sygymly USB-ýygnaýjysy bolmaly.
Ýatlap geçsek, bökdençlik geçen penşenbe güni CrowdStrike täzelenmesiniň gurluşlara awtomatik taýdan gurnalmagy bilen ýüze çykdy. Mesele CrowdStrike-yň howpsuzlyk çözgütlerini üpjün ediji hökmünde operasion ulgamyň ýadrosy derejesinde işlemegidir. Bu derejedäki ýalňyşlyk kompýuterleriň “mawy ölüm ekranyny” (BsoD) çykaryp, açylmagyny bes etmegine getirdi.
Näsazlyk, kompaniýanyň hasabyna görä, bütin dünýäde 8,5 milliondan gowrak Windows kompýuterine täsir etdi. Bu dünýädäki ähli Windows kompýuterleriniň 1%-ini emele getirýän bolsa-da, bökdençlik müňlerçe guramalaryň we möhüm infrastrukturalaryň işine uly zyýan ýetirdi.
Microsoft ýagdaýa derrew seslenip, müşderilere kömek etmek üçin hünärmenleri iberdi. Kompaniýa täsir eden kompýuterleri düzetmegiň has netijeleri usullaryny çalt tapmak üçin CrowdStrike, Google Cloud Platform we Amazon Web Services bilen hyzmatdaşlyk etdi.
