Halkara alymlar topary syçanlarda ömri uzaldýan dermany üstünlikli synagdan geçirdi. Interleýkin-11 belogynyň öňüni almaga gönükdirilen ösüş haýwanlaryň ömrüni 20-25% artdyrdy. Indi bu derman adamlarda synag edip görülýär diýip, BBC habar berýär.
Ösüş MRC-iň Lukmançylyk ylymlary laboratoriýasynyň, Londonyň imperiýa kolejiniň we Singapuryň Duke-NUS lukmançylyk mekdebiniň barlagçylaryna degişlidir.
Syçanlar bilen geçirilen synag wagtynda barlagçylar interleýkin-11 belogynyň garrama täsirini öwrendiler. Olar bu belogy öndürmek mümkinçiliginden mahrum bolan, genetiki taýdan üýtgedilen haýwanlaryň ýagdaýyna baha berdiler. Şeýle hem alymlar genomy üýtgedilmedik syçanlar toparyna interleýkin-11-i çykarmak üçin derman berdiler.
75 hepdelik, adam ýaşynyň ölçegi bilen hasaplananda 55 ýaşly syçanlara “garrama garşy derman” berildi.
Syçanlaryň iki toparynyň hem beren netijeleri hem takmynan birmeňzeş boldy. Hususan-da, haýwanlarda rak keseliniň döremek ähtimallygy azdy, myşsalarynyň ýagdaýy has gowudy, olar syratlydy we has sagdyn tüýi bilen tapawutlanýardy.
Interleýkin-11 adam bedeninde möhüm rol oýnaýar: ol adama ýaşynyň irki döwürlerinde kelläniň süňkleriniň birleşmegi, bogunlaryň güýçlenmegi we dişleriň emele gelmegi üçin zerurdyr. Şeýle-de bolsa, hünärmenleriň pikirine görä, ýaşynyň soňunda bu belok onuň garramagyna sebäp bolýar.
Alymlar interleýkin-11-i aýyrýan dermanyň howpsuz boljakdygyna ynanýarlar. Eger synaglar muny tassyklasa, garrylygy sözüň doly manysynda “bejerip bolar”. Geljekki “bejerginiň” bahasy baradaky sowal açyklygyna galýar.
