Ispaniýanyň milli ýygyndysynyň we “Barselonanyň” hüjümçisi 17 ýaşly Lamin Ýamal klubda oýun belgisini üýtgetdi. Katalon klubunyň metbugat gullugy resmi saýtda onuň 27-lik belginiň deregine 19-lyk belgide çykyş etjekdigini habar berdi.
Öň, “Barselonanyň” düzüminde bu belgide Lionel Messi çykyş edipdi. Ol 19-lyk belgili köýnekçäni toparyň esasy düzüminde çykyş edip başlanda geýdi.
Ýamal Ispaniýanyň milli ýygyndysynyň düzüminde Ýewropa çempionaty – 2024-üň ýeňijisi boldy. Topar final duşuşygynda Angliýany 2:1 hasabynda utdy. Isapniýanyň düzüminde 47-nji minutda Niko Uilýams we 86-njy minutda Mikel Oýarsabal tapawutlandy, iňlislerden 73-nji minutda Koul Palmer gol geçirdi.
Ýamal çempionatyň iň gowy ýaş oýunçysy boldy.
Lamin Ýamal Ýewro finalyndan bir gün öň – 13-nji iýulda 17 ýaşyny doldurdy.
Transfermarkt internet portaly Ýamalyň bazar bahasyny 90 mln ýewro bilen bahalandyrýar.
Öň, TmCars Messiniň Ýamaly 6 aýlykka suwa düşürendigi barada habar beripdi.
