“Barselonanyň” we Ispaniýanyň milli ýygyndysynyň 16 ýaşly ýarym goragçysy Lamin Ýamal (13-nji iýulda 17 ýaşaýar) Germaniýada geçirilýän futbol boýunça Ýewropa çempionatynyň iň zehinli oýunçylarynyň biri boldy.
Ýewroda Ýamal birnäçe rekord goýdy: ýaryşyň iň ýaş oýunçysy, ýarym finalda meýdança çykan iň ýaş futbolçy we Ýewro-da gol salan iň ýaş oýunçy. Ol Fransiýa garşy ýarym final oýnunda ýaryşda iň owadan gollaryň birini geçirip, 21-nji minutda hasaby deňledi. Ispaniýa 2:1 hasabynda utup, finala çykdy we 15-nji iýulda Angliýa bilen duşuşar.
Şol bir wagtyň özünde, ýarym finalda Ispaniýanyň ýeňşinden birnäçe sagat soň, beýleki bir yklymda 37 ýaşly Lionel Messi Amerikanyň Kubogynyň ýarym finalynda gol saldy. Argentinanyň milli ýygyndysy ýaryşyň finalyna çykdy we Kolumbiýa bilen oýnar.
Bu täzelikleriň bolýan döwri argentinaly futbolçynyň alty aýlyk bäbegi wannada suwa düşürýän suraty internetde ýaýrady. Ol çagajyk Lamin Ýamal eken.
2007-nji ýylda “Barselonanyň” “Kamp Nou” stadionynyň egin-eşik çykarylýan otagynda düşürilen bu surat bilen Ýamalyň kakasy Munir Nasraui paýlaşdy. Ol “Barselonanyň” 2008-nji ýyl senenamasy üçin düşürilipdir, onuň satuwyndan gazanylan girdejiler Kataloniýanyň we ÝUNISEF-iň haýyr-sahawat guramalaryna gönükdirilýär. Bu çäräniň çäklerinde “Barselonanyň” futbolçylary çagalar bilen surata düşýärler. Maksatnama ýüzlerçe maşgala gatnaşýar we Ýamal hem Messiniň ýanynda tötänleýin bolýar. Şular ýaly ýene bir suratda Messi Ýamaly gujagynda polotensede saklap dur, başga birinde bolsa Ýamalyň ejesi Şeýla Ebana Messä ogluny ýuwundyrmaga kömek edýär.
Fotograf Žoan Monfort “The Athletic” neşiri bilen söhbetdeşlikde suraty düşürmegiň aňsat bolmandygyny gürrüň berdi. Ol Messiniň utanjaň bolandygyny we onuň ilkibaşda çagany nähili saklamalydygyny bilmändigini, ýöne soň ähli zadyň ugruna bolandygyny ýatlaýar.
Klub derejesinde Ýamal “Barselonada” – soňky onýyllykda esasy ýyldyzy Messi bolan toparda oýnaýar. Olar meýdança bile çykyp ýetişmediler: 16 ýaşyndan bäri “Barselonada” oýnan Messi 2021-nji ýylda klubdan gitdi. Ýamal şol wagt 14 ýaşyndady – ol “Barselonanyň” esasy düzüminde diňe iki ýyldan soň çykyş edip başlady.
Ýewropa çempionatyna 16 ýaşly Lamin Ýamal okuw kitaplary bilen geldi. Ol şahadatnama almak üçin öý işlerini etdi. Futbolçy ony 1/8 final oýnundan öň aldy.
