Ýewropa çempionatynyň finalynda Ispaniýanyň ýygyndy topary 2:1 hasabynda Angliýanyň toparyny ýeňdi. Ýaryşyň netijelerine görä, aýratyn baýraga mynasyp bolan ýeňijiler yglan edildi:
Ýaryşyň iň köp gol geçiren oýunçysy hökmünde “Altyn butsy” baýragyny alanlar: Žorž Mikautadze (Gruziýa), Jamal Musiala (Germaniýa), Iwan Şrans (Slowakiýa), Kodi Gakpo (Niderlandlar), Dani Olmo (Ispaniýa) we Garri Keýn (Angliýa). Olaryň hersi üç pökgüden geçirdiler. Ýaryşyň taryhynda ilkinji gezek alty oýunçy birbada baýrak aldy. Bu UEFA-nyň düzgünleriniň üýtgemegi bilen bagly: indi “Altyn butsy” baýragy Ýewroda birmeňzeş mukdarda pökgi geçiren oýunçylara birbada gowşurylyp bilner. Bu ýagdaýda goşmaça görkezijiler indi hasaba alynmaýar.
Ispaniýanyň “Mançester Siti” toparynyň ýarym goragçysy Rodri Ýewro-2024-iň iň gowy oýunçysy diýlip ykrar edildi. Ol Ispaniýanyň milli ýygyndysynyň ýaryşdaky ýedi oýnunyň hemmesinde başlangyç düzümde çykyp, Gruziýa bilen 1/8 finalda toparynyň bir pökgüsini tora girizdi (4:1).
Iň oňat ýaş oýunçy baýragy “Barselona”-nyň we Ispaniýanyň ýygyndysynyň 17 ýaşly hüjümçisi Lamin Ýamala berildi. Ol ýaryşyň iň ýaş oýunçysy we Ýewro-nyň taryhynda pökgi geçiren iň ýaş oýunçy boldy. Umuman alanyňda, Ýamal bir pökgi geçirip, dört gezek netijeli pas berdi (şol sanda finalda-da). Netijeli pas bermek boýunça Ýamal Ýewropa çempionatlarynyň rekordyny gaýtalady.
“Atletik Bilbaonyň” we Ispaniýanyň milli ýygyndysynyň 22 ýaşly ýarymgoragçysy Niko Wilýams final oýnunyň iň gowy oýunçysy diýlip ykrar edildi. Ol Ýewro-nyň finalynda gol salan ikinji ýaş oýunçy boldy. Ondan ýaş diňe 1968-nji ýylda şol wagt 20 ýaşly italýan Pýetro Anastazi bolupdy.
Ispaniýanyň milli ýygyndysynyň dördünji gezek Ýewropanyň çempionlygyny alandygyny ýatladýarys.
