Türkmenistanyň Maliýe we ykdysadyýet ministrliginiň Intellektual eýeçilik boýunça döwlet gullugynyň başlygynyň ýolbaşçylygyndaky Türkmenistanyň wekiliýeti Bütindünýä intellektual eýeçilik guramasyna (WIPO) agza ýurtlaryň Assambleýasynyň 65-nji mejlisine gatnaşýar. Mejlis 9-17-nji iýul aralygynda Ženewada geçirilýär.
Çäräniň çäginde WIPO-nyň düzüm birlikleriniň, ýörite komitetleriniň, sebitleýin toparlarynyň nobatdaky we adatdan daşary mejlisleri geçirilýär.
Köptaraplaýyn mejlisleriň dowamynda intellektual eýeçiligi, awtorlyk hukugy we gatyşyk hukuklary goramak, innowasion tehnologiýalary we emeli aňy höweslendirmek bilen baglanyşykly meseleler ara alnyp maslahatlaşylar.
Şeýle hem WIPO-nyň Assambleýasynyň çäginde, Administratiw Geňeşiň mejlisini goşmak bilen Ýewraziýa patent guramasynyň (EAPO) 30 ýyllygyny bellemek boýunça çäreler geçiriler.
Türkmenistanyň intellektual eýeçilik ulgamyny ösdürmegiň 2021 – 2025-nji ýyllar üçin Maksatnamasynyň ileri tutulýan ugurlary Assambleýanyň meýdançasynyň çäklerinde türkmen wekiliýetiniň geçirjek ikiataraplaýyn duşuşyklarynyň dowamynda ara alnyp masahatlaşylar.
