Germaniýanyň Karlsrue Tehnologiýa institutynyň alymlary göz perdesini 3D çap etmegiň usulyny oýlap tapdylar. VisioPrinTech-iň tehnologiýasy hassanyň sütün öýjüklerinden alnan biosyýany ulanýar. Şeýle hem alymlar operasiýa üçin ýörite işlenip taýýarlanýan material hökmünde dury süýümleri ulandylar.
Täze usul her bir hassanyň şahsy aýratynlyklaryny göz öňünde tutup, emeli göz perdesini döretmäge mümkinçilik berýär. Tehnologiýa donor göz perdeleriniň ýetmezçiligi meselesini çözmäge we oturdylandan soň azmak töwekgelçiligini azaltmaga gönükdirilendir.
Ýörite lazer ulgamy öýjükleriň göze takyk ýerleşdirilmegini üpjün edip, alyşmazlyk töwekgelçiligini peseldýär.
Barlagçylar taslama üstünde Karl Zeiss Meditec AG-iň we Evonik Healthcare-iň hünärmenleri bilen bilelikde işlediler.
Alymlar häzirki wagtda VisioPrinTech-iň uly göwrümli synaglaryna taýýarlyk görýärler we görşi pes adamlaryň durmuşyny gowulandyrmak üçin tehnologiýanyň giňden ulanylmagyna umyt baglaýarlar.
Bütindünýä saglygy goraýyş guramasynyň berýän maglumatlaryna görä, göz perdesiniň durulygynyň ýitmegi sebäpli, takmynan, 2 million adam görmekden galdy. Ondan hem köp adam başga näsazlyklar bilen ýüzbe-ýüz bolýar. Adatça, bejergi göz perdesini transplantasiýa etmek bilen geçirilýär. Emma bu çemeleşmäniň donorlaryň ýetmezçiligi we transplantasiýada alyşmazlyk töwekgelçiligi bilen baglanyşykly birnäçe kemçilikleri bar.
