2024-nji ýylyň 1-nji iýuly ýagdaýyna Türkmenistanyň Prezidentiniň degişli Kararyna laýyklykda, Aşgabat we Arkadag şäherlerinde hem-de ýurdumyzyň welaýatlarynda raýatlara gozgalmaýan emlägi satyn almak üçin berlen ipoteka karzlaryň galyndysy geçen ýylyň degişli döwri bilen deňeşdirilende, 12,4 göterim artdy. Bu barada Merkezi bankyň başlygy T.Mälikow şu gün giňişleýin Hökümet mejlisinde 2024-nji ýylyň alty aýynda alnyp barlan işleriň netijeleri barada hasabatynda habar berdi.
Bellenilişi ýaly, hasabat döwründe bank ulgamy tarapyndan ykdysadyýete karzlaryň gönükdirilmegi dowam etdirildi. 2023-nji ýylyň degişli döwri bilen deňeşdirilende, şu ýylyň birinji ýarymynda ýurdumyzyň banklary tarapyndan hususy ulgama berlen karzlaryň umumy möçberi artdy. Şunuň bilen birlikde, kiçi we orta telekeçiligi goldamak üçin ýeňillikli karzlaryň, şeýle hem hususy oba hojalyk önümlerini öndürijilere gönükdirilen karz serişdeleriniň görkezijisi artdy.
2024-nji ýylyň 1-nji iýuly ýagdaýyna ýurdumyzyň karz edaralarynyň gazanan arassa peýdasynyň umumy möçberi geçen ýylyň degişli senesine görä, 5 göterim artdy.
