9-njy iýulda Türkmenistanda Saýlawlary we sala salşyklary geçirmek boýunça merkezi toparyň mejlisinde Aşgabat şäheriniň 1-nji “Garaşsyzlyk”, 2-nji “Bitaraplyk” we 6-njy “Köpetdag” saýlaw okruglary boýunça Türkmenistanyň Mejlisiniň möhletinden öň çykyp giden deputatlarynyň ýerine geçirilen saýlawlaryň ahyrky netijeleri jemlenildi.
Çärä merkezi saýlaw toparynyň agzalary, onuň ýanynda döredilen iş toparlarynyň wekilleri, milli synçylar, köpçülikleýin habar beriş serişdeleriniň wekilleri gatnaşdylar.
Bellenilişi ýaly, 7-nji iýulda geçirilen Mejlisiň deputatlarynyň saýlawlaryna üç saýlaw okrugynyň çäginde ýaşaýan 79 müň 121 adam gatnaşdy. Bu bolsa bellige alnan saýlawçylaryň umumy sanynyň 91,32 göterimine deňdir. Has takygy, Aşgabat şäheriniň 1-nji «Garaşsyzlyk» saýlaw okrugynda saýlawçylaryň 91,84%, 2-nji «Bitaraplyk» saýlaw okrugynda saýlawçylaryň 90,69%, 6-njy «Köpetdag» saýlaw okrugynda saýlawçylaryň 91,46% ses berdiler.
Mejlisde Aşgabat şäheriniň saýlaw toparynyň başlygynyň saýlawlaryň netijeleri baradaky hasabaty diňlenildi. Saýlaw kodeksine laýyklykda we demokratik ýörelgeler esasynda üç saýlaw okrugynda geçen saýlawlarda bir deputatyň ornuna üç dalaşgär bellige alyndy.
Hereket edýän kanunçylyga laýyklykda, saýlanan deputatlaryň sanawy ýakynda wagtda mälim ediler.
