Alymlar salamandrlara meňzeş bir haýwanyň dinozawrlardan hem 40 million ýyl ozal ýaşandygyny anykladylar.
Nature žurnalynda on ýyla golaý wagt alan ylmy gözlegleriň dessin netijeleri çap edildi. Dört sany dürli nusgadan alnan galyndylaryň, şol sanda näbelli jandaryň kellesiniň hem-de oňurga süňkleriniň üstünde alnyp barlan ylmy derňewler ýaşap ýören dünýämiziň ilkinji eýýamlary hakynda täzeçe maglumatlary berdi.
Ylmy barlagçylar Namibiýa döwletinde tapylan hem-de «Gaiasia jennyae» diýlip atlandyrylan bu jandaryň 280 million ýyl mundan ozal ýaşap geçendigini çaklaýarlar. Onuň kellesi takmynan 60 santimetre barabar bolupdyr.
Alymlaryň pikirine görä, bu täsin jandar batgalyklaryň hem-de kölleriň düýbüni mesgen tutunan bolmaly. Onuň dinozawrlaryň ilkinji görnüşlerinden hem takmynan 40 million ýyl ozal ýaşandygy ähtimaldyr.
Ylmy derňewleriň awtorlarynyň biri Jeýson Pardo (Jason Pardo) «Gaiasianyň» iňňän ir eýýamlara degişlidigi haýran galdyrýar diýip belleýär. Şeýle hem Pardo bu jandaryň «40 million ýyl mundan ozal ýitip, ýok bolup giden organizmler bilen baglanyşykly bolup biljekdigini» aýdýar.
