Floridanyň (ABŞ) Kanaweral burnundaky kosmodromdan Türkiýäniň Türksat 6A aragatnaşyk hemrasy uçuryldy. Uçuryş SpaceX kompaniýasy tarapyndan Falcon 9 raketa göterijisiniň kömegi bilen amala aşyryldy diýip, Anadolu agentligi habar berýär.
Türksat 6A 20 sany Ku-diapazon geçirijisine eýe bolup, Hindistanda, Tailandda, Malaýziýada we Indoneziýada 4,5 mlrd adam üçin aragatnaşyk hyzmatlaryny hödürlär. Hemranyň agramy 4 229 kg we ol Ýerden 35 786 km uzaklykda ýerleşer.
Hemra azyndan bir aý synagdan soň Türksat kompaniýasy tarapyndan ulanylyşa giriziler.
Türksat 6A-nyň uçurylmagy netijesinde Türkiýe özüniň aragatnaşyk hemralary bilen planetanyň ilatynyň 65%-den gowragyny gurşap alar.
Türksat 6A Ankaradaky TAI kompaniýasynyň Kosmos ulgamlarynyň integrasiýa we synag merkezinde (USET) türk inženerleri tarapyndan taýýarlandy.
Hemrada ýerli komponentiň paýy 80%-den gowrak. Taslama Türkiýäniň Ulag we infrastruktura ministrliginiň, Türksat, TÜBITAK UZAY, ASELSAN, TAI we CTECH kompaniýalarynyň gatnaşmagynda durmuşa geçirildi.
Türkiýe 2000-nji ýyllaryň başynda kosmos maksatnamasyny işjeň ösdürip başlady, ýöne ilkinji hemrasyny 1994-nji ýylda uçurdy. Ol dokuz aragatnaşyk hemrasyny, şeýle-de Ýere gözegçilik etmek üçin dürli datçikler we sensorlar bilen üpjün edilen gözleg enjamlaryny orbita çykardy. Ýurt harby maksatly hemralary işläp taýýarlamagyny dowam edýär, şeýle-de Axiom 3 missiýasynyň düzüminde özüniň astronawtyny kosmosa iberdi.
