Sisiliýa adasyndaky Etna wulkany ýekşenbe güni işjeňleşip, 5 kilometre çenli dik ýokary kül we tüsse sütünini zyňdy. Şeýle-de, wulkan lawa çüwdürimini hem çykaryp başlady diýip, EFE gullugyna salgylanýan Interfax ýazýar.
Italiýanyň Milli geofizika we wulkanlary öwreniş institutynyň berýän habaryna görä, wulkanyň işjeňligi 2,8 müň metr belentlikde bolup geçýän yzygiderli ýertitremeler bilen utgaşýar, emma bu hadysa golaýyndaky şäherlere howp salmaýar.
Ondan öň, penşenbe güni Etnada lawanyň we külüň zyňlyp çykmalary eýýäm göze ilip ugrapdy, şonuň üçin anna güni Kataniýanyň howa menzili ýapyldy. Howa menzili häzirki wagtda kadaly işleýär.
Etna - Sisiliýanyň gündogarynda ýerleşip, Ýewropadaky iň işjeň wulkandyr.
