ABŞ-nyň Azyk önümleriniň we derman serişdeleriniň hiline gözegçilik müdirligi (FDA) Syncromune biofarmasewtika kompaniýasy tarapyndan işlenip düzülen SYNC-T SV-102 dermanyna dessin tassyklanmaga degişli statusyny berdi. Bu derman bilen berlen bejergi keseliň soňky derejesindäki käbir hassalarda çişiň, şol sanda süňkde metastaz bolan ýagdaýynda-da, doly aýrylyp gitmegine getirdi diýip, New Atlas neşiri ýazýar.
Bu derman peşew mäziniň metastatiki kastrasiýa-rezistent raky (CRPC) bilen kesellän näsaglary bejermek üçin niýetlenendir.
SYNC-T SV-102 rak keseline garşy immunitetini güýçlendiriji görnüşinde gönüden-göni çişe sanjym edilýär. Kliniki barlaglar hassalaryň 85% -iniň bejergä jogap berendigini, takmynan, ýarysynda keseliň doly gowşandygyny, ýarysynda bolsa bölekleýin gowşandygyny görkezdi.
Doly gowşamak rak keseliniň alamatlarynyň doly ýok bolmagyny, bölekleýin gowşamak bolsa çişiň ululygynyň kiçelendigini aňladýar. Derman her dört hepdeden 12 aýlawa çenli goýberildi.
ABŞ-nyň düzgünleşdiriji guramasy öz beýanatynda dermanyň tassyklanmagyny çaltlaşdyrmak hassalary täsirli sanjym bilen mümkin boldugyça ir üpjün etmäge mümkinçilik berer diýdi.
Alymlar ABŞ-da has uly kliniki barlaglary geçirmegi meýilleşdirýärler. Şowly netijeler SYNC-T SV-102-iň FDA tarapyndan doly tassyklanmagyna kömek eder.
Çeşmäniň belleýşi ýaly, bu rak keseliniň soňky derejesini göz öňünde tutsaň, örän möhüm netijedir. San maglumatyna salgylansaň, adaty bejergi, adatça, 20-40% peýda edýär.
