Şanhaý Hyzmatdaşlyk Guramasynyň Astanada geçirilen sammitiniň çäklerinde “ŞHG+” görnüşde wekiliýetleriň ýolbaşçylarynyň duşuşygynda eden çykyşynda Türkmenistanyň Halk Maslahatynyň Başlygy Gurbanguly Berdimuhamedow gurama bilen hyzmatdaşlygyň möhümdigini belläp, ony ähmiýetli we geljegi uly hyzmatdaş diýip atlandyrdy.
Ol ŞHG bilen hyzmatdaşlygyň Türkmenistanyň milli bähbitlerine laýyk gelýändigini we halkara ýagdaýy durnuklaşdyrmaga goşant goşmaga ukyplydygyny belledi.
Gurbanguly Berdimuhamedow öz çykyşynda özara gatnaşygyň esasy ugurlaryny görkezdi:
- Ulag geçelgeleri: Türkmenistan özüni Gündogar – Günbatar we Demirgazyk – Günorta ugurlarynyň halkasy hökmünde görmek bilen, Hytaý – Gyrgyzystan – Özbegistan – Türkmenistan – Eýran – Türkiýe geçelgesini we Hazar deňziniň gündogar kenarýakasynyň ugry bilen Demirgazyk – Günorta geçelgesini ösdürmekde hyzmatdaşlygy teklip edýär.
- Ykdysadyýet: Söwda, senagat kooperasiýasyna, oba hojalyk ulgamyna, “ýaşyl” gün tertibine we maglumat tehnologiýalaryna aýratyn üns berilýär.
- Ynsanperwer ugur: Türkmenistan bilim, ylym, medeniýet we ýaşlar syýasaty ulgamlarynda hyzmatdaşlygy giňeltmäge çalyşýar. Taryhy-medeni mirasy öwrenmek; innowasion geljek; ýaşlaryň daşky gurşawy goramaga goşandy; ýaşlar telekeçiligi we işewürlik taslamalary ýaly ugurlar boýunça bilelikdäki ýaşlar maksatnamalaryny işläp taýýarlamak teklip edilýär.
- Sport: “Garaşsyz Döwletleriň Arkalaşygynyň täze sport mümkinçilikleriniň şäheri” derejesini alan Aşgabat sport ugrunda halkara hyzmatdaşlyk, şol sanda ŞHG döwletleriniň türgenleriniň gatnaşmagy arkaly hyzmatdaşlyk üçin açykdyr.
Şeýle-de, Berdimuhamedow ŞHG bilen Türkmenistanyň BMG-de Prezident Serdar Berdimuhamedow tarapyndan öňe sürlen Ählumumy howpsuzlyk strategiýasyny döretmek baradaky başlangyjyny goldamak mümkinçiligini ara alyp maslahatlaşmagy teklip etdi.
