Sanly tehnologiýalar “bar bolan ikinji esasy howp” hasaplanýar. Şeýle pikir bilen BMG-niň Baş sekretary Antoniu Guterriş Şanhaý Hyzmatdaşlyk Guramasynyň Astanada geçirilen sammitinde çykyş etdi diýip, El.kz habarlar agentligi habar berýär.
“Emeli aň hemmeleriň bähbidine durnukly ösüşi çaltlaşdyrmak üçin uly potensiala eýe” diýip, Guterriş belledi, ýöne emeli aňyň şol bir wagtyň özünde güýçleriň deňagramsyzlygyny ýitileşdirip, adam hukuklaryna zyýan ýetirýändigini we dartgynlylygy hem dawa-jenjelleri güýçlendirýändigini sözüniň üstüne goşdy.
“Bize emeli aň üçin töwekgelçilikleri dolandyryş sistemalary, şeýle-de zyýany gözegçilikde saklamak we gowşatmak barada ylalaşmak üçin tehnologiýa kompaniýalary, ylmy toparlar, raýat jemgyýeti bilen işleşýän hökümetleriň doly gatnaşmagyny gyssagly üpjün etmek gerek” – diýip, BMG-niň Baş sekretary aýtdy.
Guterriş meseleleri çözmek üçin bäş ileri tutulýan ugry teklip etdi:
- Emeli aň boýunça halkara ylmy topary döretmek;
- Milli, sebit we pudak wekilleri bilen yzygiderli syýasy dialog;
- Adam hukuklaryny goramak üçin umumy ahlak kadalaryny we ülňülerini işläp taýýarlamak;
- Emeli aň algoritmlerini okatmak üçin ulanylýan maglumatlary dolandyrmagyň ýörelgeleri we mehanizmleri;
- Ösýän ýurtlara goldaw bermek, olaryň potensialyny ösdürmek we bu maksatlar üçin global gaznany döretmek.
BMG bu başlangyçlary durmuşa geçirmek, şol sanda emeli aňy öwrenmek boýunça topar döretmek, ülňüleri we ahlak kadalaryny işläp taýýarlamak, maglumatlary dolandyrmak we ösýän ýurtlara kömek etmek maksady bilen global gaznany döretmek üçin platforma hödürlemäge taýýar.
Belläp geçsek, Guterriş bar bolan esasy howp hökmünde howanyň üýtgemegini belledi. Ol dünýä ýurtlaryny kömürturşy gazynyň zyňyndylaryna we gazylyp alynýan energiýa çeşmelerini ulanýan kompaniýalaryň artyk girdejilerine salgyt girizmäge çagyrdy.
