NASA astronawtlaryň 2-nji iýula meýilleşdirilen açyk kosmosa çykyşlygyny yza süýşürmeli boldy. IXBT-iň habar bermegine görä, muňa skafandryň sowadyjy suwuklygynyň syzmagy bilen baglanyşykly waka sebäp boldy.
Bu mesele 24-nji iýunda açyk kosmosa geçen gezekki çykyşlyk wagtynda 31 minutdan soň astronawt Treýsi Kolduell Daýson syzylma sebäpli işini bes etmäge mejbur bolanda ýüze çykdy. Ýerdäki topar bu syzylmanyň sebäbini entek anyklap bilmediler.
NASA-nyň Halkara kosmos stansiýasynyň programmalarynyň integrasiýa menejeri Bill Spetç: "Näme bolandygyna düşünmek üçin biz topara ýeterlik wagt bermek isleýäris" - diýdi.
Açyk kosmosa çykmaklyk enjamlary çalyşmak we oturtmak, ylym enjamlarynyň geljekki täzelenmesine taýýarlyk görmek we stansiýanyň turbageçirijilerini surata düşürip barlamak meýilleşdirildi.
Sowadyjy suwuklygyň syzylmalary – bu astronawtlaryň HKS-da açyk kosmosa çykanlarynda yzygiderli ýüzbe-ýüz bolýan meselesidir. 2022-nji ýylyň mart aýynda ESA-nyň astronawty Mattias Maurer açyk kosmosa çykandan soň şlemine suw ýygnanandygyny bilip galýar. 2013-nji ýylda Ýewropa kosmos gullugynyň (ESA) astronawty Luka Parmitano açyk kosmosa çykanda şlemine ep-esli suwuň syzmagyna sezewar boldy. Bu mesele açyk kosmosa çykyşlygyň ýedi aýlyk yza süýşürilmegine sebäp boldy.
