1-nji iýuldan ÝUNESKO-nyň Bütindünýä mirasynyň obýekti we Ýaponiýanyň nyşany bolan Fudzi dagyna çykmak isleýän syýahatçylar üçin täze düzgünler güýje girdi. Ýerli häkimiýetler düzgünleriň kömegi bilen gelýän adamlaryň sanyny çäklendirmäge we tebigy mirasy gorap saklamaga çalyşýarlar diýip, CNN habar berýär.
Indi daga çykmak isleýän syýahatçylar adam başyna ¥2000 (12 dollardan sähel köp) möçberde salgyt tölemeli bolarlar. Şeýle-de, her gün daga 4 müňden köp adam goýberilmez.
Ýamanasi prefekturasynyň gubernatory Kotaro Nagasaki bu çäreleriň howpsuzlygy üpjün etmäge we Fudzi dagyny geljekki nesiller üçin gorap saklamaga gönükdirilendigini belledi.
Maliýe çäklendirmelerinden başga-da, syýahatçylara özüňi alyp barmagyň berk düzgünleri-de garaşýar. Indi ýolbeletler ýodalarda howpsuzlyga gözegçilik edip, alpinistlere dag ýodasynyň gyrasynda ýatalga gurmagyň, ot ýakmagyň we ýerliksiz egin-eşik geýmegiň gadagandygy barada duýdurarlar.
CNN-iň maglumatlaryna görä, 2019-njy ýylda Fudzi dagyna 5 mln adam baryp gördi, bu 2012-nji ýyl bilen deňeşdirilende, 3 mln adam köpdür. Syýahatçylaryň artmagy zir-zibiliň köpelmegine, kömürturşy gazynyň zyňyndylarynyň ýokarlanmagyna getirdi we dagyň ekologiýasyna ýaramaz täsir etdi. Häkimiýetler täze düzgünleriň Fudzi dagyny geljekki zaýalanmalardan goramaga kömek etmegine bil baglaýarlar.
