Beýik Britaniýadaky Nottingem Trent uniwersitetiniň barlagçylary manyly, täsirli ýüz keşbiň adamyň jemgyýetçilik durmuşyna edýän täsirini öwrendiler. Netijeler ýüz keşbiniň manyly bolmagy adamlary has özüne çekiji edýändigini we ýüzünde many az adamlar bilen deňeşdirilende, olary jemgyýetde has üstünlikli edýändigini görkezdi.
Synag wagtynda alymlar 52 meýletinçiniň arasynda bolan 1500-den gowrak söhbetdeşligi seljerdiler. Olaryň gepleşikleri söhbetdeşleri utandyrar, güldürer we dürli duýgulary başdan geçirer ýaly ýörite işlenip taýýarlandy. Käbir ýagdaýlarda gatnaşyjylardan adaty ýüz keşbini saklamak ýa-da tersine, duýgularyny has köpräk ýüzüne çykarmak haýyş edildi. Bularyň hemmesi wideo ýazga alyndy. Goşmaça meýletinçileriň ýüzlerine çykýan duýgulary ýüz myşsalarynyň işjeňligine gözegçilik edýän ýörite FACS ulgamy arkaly ýazga alyndy.
Şondan soň, alymlar tarapyndan saýlanan ýazgylar synaga gatnaşýan beýleki 170-den gowrak adama görkezildi. Olardan wideodaky adamlaryň haýsy duýgulary ýüze çykarýandygyny kesgitlemek we olaryň duýgusyny ýüze çykaryşynyň derejesi barada gürrüň bermek haýyş edildi.
Duýgularyny ýygy-ýygydan, has aýyň ýüzüne çykarýan adamlaryň beýlekileriň göwnünden turýandygy belli boldy. Mundan başga-da, beýle mimika nätanyş adamlara has düşnüklidir, bu adamlara jemgyýete ugruňy has gowy kesgitlemäge we maksatlaryna ýetmäge kömek edýär. Mysal üçin, şeýle gatnaşyjylar synaga gatnaşanlygy üçin sylaglanmak baradaky gepleşiklerde-de has gowy netijeleri görkezdiler.
Alymlaryň pikirine görä, alnan netijeler diňe bir şahsy gatnaşyklara düşünmek üçin däl, eýsem, aragatnaşyk endiklerini ýokarlandyrmaga gönükdirilen okuwlaryň we treningleriň täze usullaryny ösdürmekde hem ähmiýetli bolup biler.
