Ýaponiýanyň SoftBank Corp. kompaniýasy telefon gepleşiklerinde emosiýalary ýumşadyp biljek täze emeli aň tehnologiýasyny hödürledi. “Emosiýany ýatyrmak” diýlip atlandyrylýan emeli aň gepleýän adamyň sesini seljerip, gazaply äheňi ýumşadýar-da, gaharly sözleri biraz köşeşen görnüşde ýetirýär diýip, South China Morning Post ýazýar.
Tehnologiýa her gün nägilelik bildirýän müşderiler bilen iş salyşýan jaň merkezleriniň we tehniki goldawyň işgärleriniň stresini azaltmak üçin döredildi. Ýaponiýada, dünýäniň köp ýurtlarynda bolşy ýaly, müşderileriň jaň merkezleriniň işgärlerine igesini sürtmegi umumy ýaýran mesele. Geçirilen pikir soraşmalar şeýle edaralaryň işgärleriniň 47%-iniň müşderileriň emosional basyşyna duçar bolýandygyny görkezdi. Ýaponiýada operatorlaryň psihologa kömek sorap ýüz tutan ýüzlerçe ýagdaýlary hasaba alyndy.
Häzirki wagtda “Emosiýany ýatyrmak” diňe ýapon dilini goldaýar, ýöne işläp düzüjiler iňlis we beýleki dillere goldaw goşmak bilen, onuň işleýşini giňeltmegi meýilleşdirýärler. Geljekde tehnologiýa dünýä bazaryna çykyp biler.
AI-niň gödek, gelşiksiz sözleri süzüp bilmeýändigini, diňe äheň bilen işleýändigini bellemelidiris.
