Amerikaly telekeçi, dünýäniň iň belli maýadarlarynyň biri Uorren Baffet Berkshire Hathaway kompaniýasynyň 5,3 mlrd dollarlyk paýnamasyny bäş haýyr-sahawat guramasyna bagyş etdi. Baffet üçin bu iň uly ýyllyk haýyr-yhsan boldy diýip, CNBC habar berýär.
Baffet 8 674 sany A klas paýnamany 13 milliondan gowrak B klas paýnamasyna konwertirledi. Soň olar Bill we Melinda Geýtsiň gaznasynyň (9,93 mln paýnama), Sýuzan Tompson Baffetiň gaznasynyň (onuň merhum birinji aýalynyň hatyrasyna) we çagalary Goward, Sýuzan we Piter Baffetler tarapyndan dolandyrylýan üç gaznanyň arasynda paýlandy.
Netijede, Baffetiň Berkshire Hathaway-däki paýy azaldy, ýöne ol henizem 207 963 A klas paýnamasyna we 2 586 B klas paýnamasyna eýeçilik edýär. Olaryň umumy bahasy, takmynan, 130 mlrd dollara barabar.
Baffet öz baýlygynyň esli bölegini haýyr-sahawata bermek wadasyna eýerip, 2006-njy ýyldan bäri her ýyl uly haýyr-yhsan bagyş edýär. 93 ýaşly maýadar 135 mlrd dollar baýlygy bilen dünýäniň iň baý adamlarynyň reýtinginde 10-njy orny eýeleýär (Bloomberg Billionaries Index).
