28-nji iýunda geçirilen Hökümet mejlisiniň barşynda wise-premýer B.Annamämmedow elektroenergetika pudagynyň maddy-enjamlaýyn binýadyny pugtalandyrmak boýunça alnyp barylýan işler barada hasabat berdi.
Bellenilişi ýaly, häzirki wagtda Aşgabadyň binagärlik we şähergurluşyk keşbini has-da gözelleşdirmek, ony ýaşamak, işlemek we dynç almak üçin amatly şähere öwürmek ugrunda degişli çäreler görülýär.
Şunuň bilen baglylykda, Aşgabat şäheriniň şaýollarynda, köçelerinde we seýilgählerinde oturdylan daşky yşyklandyryş ulgamlaryna tehniki taýdan hyzmat edýän gullugyň işini kämilleşdirmek, hususan-da, döwrebap awtotehnikalar bilen üpjün etmek boýunça degişli işleriň geçirilýändigi barada aýdyldy.
Serdar Berdimuhamedow Türkmenistanyň Energetika ministrliginiň maddy-enjamlaýyn binýadyny berkitmek üçin döwrebap ýöriteleşdirilen awtotehnikalary satyn almak baradaky teklibi goldady we degişli işleri geçirmegi tabşyrdy.
