Günorta Koreýanyň kompaniýalarynyň Arkadag “akylly” şäheriniň ikinji tapgyrynyň gurluşygyna we “Aşgabat-siti” taslamasyny durmuşa geçirmäge gatnaşmagy üçin uly mümkinçilikler bar. Bu barada“Daewoo Engineering & Construction Co.,Ltd.” kompaniýasynyň ýolbaşçysy Bek Jung-Wanyň 27-nji iýunda Prezident Serdar Berdimuhamedow bilen geçiren duşuşygynda bellenildi.
Duşuşygyň dowamynda gaz we himiýa senagaty, ulag, ýokary tehnologiýalar we maýa goýum ulgamlary, şeýle hem beýleki köpsanly ulgamlar ileri tutulýan ugurlaryň hatarynda görkezildi. Şunda bar bolan kuwwatly we mümkinçilikleri nazara almak bilen, tagallalary birleşdirmek has netijeli hasaplanylýar.
Türkmen-koreý ykdysady gatnaşyklaryny ösdürmäge koreý kompaniýalary uly goşant goşýarlar diýip, Prezident Serdar Berdimuhamedow aýtdy we olaryň ýurdumyzyň gaz we himiýa senagatynda iri taslamalary durmuşa geçirmäge işjeň gatnaşýandygyny belledi.
Häzirki wagtda Türkmenistanda ykdysadyýeti döwrebaplaşdyryp, diwersifikasiýa ýoly bilen ösdürmek, iri önümçilik taslamalaryny durmuşa geçirmek boýunça döwlet derejesinde maksatnamalar amala aşyrylýar.
Şunuň bilen baglylykda, döwlet Baştutany “Türkmenhimiýa” döwlet konserni bilen “Daewoo Engineering & Construction Co.,Ltd” kompaniýasynyň arasynda ýola goýlan oňyn hyzmatdaşlyga ýokary baha berip, türkmen tarapynyň Türkmenistanda himiýa senagatyny ösdürmekde, hususan-da, fosfor, ammiak hem-de karbamid dökünlerini öndürmekde hyzmatdaşlygy giňeltmek boýunça koreýaly hyzmatdaşlaryň anyk tekliplerine seretmäge taýýardygyny belledi.