Disney+ striming hyzmaty meşhur “Tapmaça” («Головоломка») animasion filminiň esasynda multserial çykarar. Bu barada Entertainment Weekly bilen söhbetdeşlikde Pixar-yň döredijilik müdiri we franşizany dörediji Pit Dokter habar berdi.
“Düýşler studiýasy” adyny alan täze serialyň önümçiligi eýýäm tamamlandy we geljek ýylyň ýazynda Disney+-da çykar. Serialyň wakasy “Tapmaçanyň” baş gahrymany Raýli Anderseniň kellesinde düýş döredýän “Düýşler studiýasynda” bolup geçýär.
“Tapmaça 2” 13-nji iýunda çykdy we dünýä prokatynda ilkinji uik-endde 295 mln dollar ýygnap, Disney-iň animasion taslamalarynyň arasynda rekord goýdy. Multfilmiň birinji bölümi 2015-nji ýylda çykdy. Ol Raýli atly okuwçy gyzyň kellesinde ýaşaýan duýgular: Şatlyk, Gussa, Gorky, Gahar we Ýigrenç barada gürrüň berýär.
