“Rossiýa” teleýaýlymy “Kinopoisk” we Start onlaýn-kinoteatrlary bilen bilelikde Lew Tolstoýyň “Uruş we parahatçylyk” (“Война и мир”) romany esasynda köp seriýaly filmi surata düşürmegiň üstünde işläp başlady diýip, TASS habar berýär.
Bu seriala Mihail Şolohowyň “Ýuwaş Don” (“Тихий Дон”) we Wasiliý Grossmanyň “Durmuş we ykbal” (“Жизнь и судьба”) romanlarynyň esasynda düşüren filmleri bilen tanalýan Sergeý Ursulýak režissýorlyk eder. Aktýorlaryň kastinginiň jikme-jiklikleri entek yglan edilmedi.
Şol bir wagtyň özünde öň “Goragçylar” (“Защитники”), “Gör, erkekler näme edýär!” (“Что творят мужчины!”) we "Onegin" filmlerine režissýorlyk eden Sarik Andreasýan Lew Tolstoýyň romanynyň doly göwrümli film görnüşini yglan etdi! Ol filmi geljek ýyl surata düşürip başlar.
“Uruş we parahatçylyk” on gezekden gowrak ekranlaşdyryldy. 1956-njy ýylda amerikaly režissýor King Widor Nataşa Rostowanyň keşbinde Odri Hepberniň oýnamagynda film döretdi. 1965–1967-nji ýyllarda Sergeý Bondarçukyň dört bölümli filmi çykdy we ol daşary ýurt dilindäki iň gowy film üçin “Oskar” baýragyny aldy.
Bu roman 1805-1820-nji ýyllary öz içine alýar we Napoleon söweşleriniň fonunda birnäçe aristokrat maşgalasynyň durmuşy barada gürrüň berýär.
