Demirgazyk-Gündogar Federal Uniwersitetiniň (SWFU) alymlar topary Ýakutiýada tapylan we 44 müň ýyldan gowrak taryhy bolan möjegiň mumiýasynyň autopsiýasyny geçirdi. Autopsiýanyň netijeleri barada SWFU-nyň web sahypasynda habar berildi.
Barlagçylaryň sözlerine görä, bu giçki pleýstosen eýýamynyň uly möjeginiň bitewiligine we gowy saklanyp galan göwresiniň ilkinji gezek tapylyşydyr. Mumiýa 2021-nji ýylda Russiýa Federasiýasynyň Saha Respublikasynyň Abyýski etrabynyň ýaşaýjylary tarapyndan Tirehtýah derýasynda köp ýyllyk buz gatlagynyň 40 metr çuňlugyndan tapyldy.
Mamont muzeýiniň barlaghanasynda geçirilen autopsiýa barlagynda alymlar DNK-ny öwrenmek üçin haýwanyň içki beden agzalaryndan, aşgazanyň we içegäniň içinden, şeýle-de, ýumşak dokumalaryndan nusgalary aldylar. Barlaglar gadymy möjegiň iýen iýmitine we mikrobiotasyna düşünmäge hem-de onuň genomyny häzirki möjekleriň genomy bilen deňeşdirmäge kömek eder.
"Barlagyň netijeleri gadymy süýdemdirijileriň nähili bolandyklaryna we olaryň bedeninde ýaşaýan mikroorganizmleriň ýagdaýyna has gowy düşünmäge mümkinçilik berer" – diýip, Eksperimental medisina institutynyň funksional genomika we proteomika laboratoriýasynyň müdiri Artemiý Gonçarow belledi.
Autopsiýa barlagyna ýakut alymlaryndan başga-da, Sankt-Peterburgyň hünärmenleri hem gatnaşdylar.
Alymlar bu barlagyň gadymy haýwanlaryň we mikrobiotanyň ösüşi barada täze maglumatlary tapmaga, şeýle hem lukmançylyk we biotehnologiýa üçin biologiki işjeň maddalaryň geljegi uly öndürijilerini tapmaga kömek etjegine umyt baglaýarlar.
Barlagyň indiki obýekti 2023-nji ýylda Ýakutiýanyň Nižnekolymsk sebitinden tapylan we uniwersitete getirilen gadymy möjegiň başga bir mumiýasy bolar.
