Massaçusetsiň Tehnologiýa institutynyň hünärmenleri sementiň batareýa ýaly energiýa saklap bilýän täze görnüşini döretdiler. Materialyň düzümi adaty sementden, suwdan we tehniki ugleroddan ybarat.
Bu komponentleriň aýratyn utgaşmasy netijesinde sement elektrik geçiriji häsiýetlere eýe bolup, öz içinde geçirijiler toruny emele getirýär diýip, täze önümiň awtorlaryndan biri Admir Maşiç IFLScience žurnalyna gürrüň berdi.
Täze material adaty batareýalara garanyňda ep-esli arzan düşýär we öndürmek aňsat. Taslamanyň awtorlary ony Gün energiýasyny ýygnajak we elektrik ulaglaryna zarýad bermek bilen, energiýa tygşytlaýan ýollary çekmekde, şeýle hem özlerini elektrik bilen üpjün edip biljek jaýlary gurmakda ulanmagy meýilleşdirýärler.
Taslama ekologiýa taýdan zyýansyz ýaşyl elektrik energiýasy pudagyna tarap ädilen möhüm ädimdir. Gurluşykda täze sementiň ulanylmagy adaty energiýa çeşmelerine garaşlylygy azaldyp, has durnukly ösüşe ýardam edip biler.
