Russiýaly alymlar sözdäki ýalany 92% takyklyk bilen kesgitlemegiň usulyny tapandyklaryny habar berdiler. Bu barada Nižniý Nowgoroddaky “Ýokary ykdysadyýet mekdebi” ylmy-barlag uniwersitetiniň (НИУ ВШЭ) barlagçylaryna salgylanýan TASS habar berýär.
Algoritm ýüz keşbi, sözleýiş äheňini, dil baýlygyny, sintaksisi we yşaratlary öz içine alýan 32 alamaty seljerýär. Synag wersiýasy dildäki detallara, geplenýän wagtyndaky säginmelere we ýüzüň ýokarky böleginiň mimikasyna baha bermek bilen, 10-dan gowrak usuly birleşdirýär.
"Bu usullar aragatnaşygyň dürli derejelerini öz içine almak bilen, biri-biriniň üstüni ýetirýär. Biz olary birleşdirýäris, bu bolsa anyklaýşyň takyklygyny we netijeleriň dogrulygyny ýokarlandyrýar" - diýip, barlaga gatnaşyjylaryň biri Anna Homenko belledi.
Synag üçin alymlar 20 adamyň çyn we ýalan maglumatlary aýdýan sözlerini 3,5 sagatlap wideo ýazga aldylar. Netijeler, takyklygy 92%-e çenli bolan türgenleşik nusgasynda usulyň ygtybarlylygyny görkezdi. Semantik aýratynlyklar, ýüzüň myşsalarynyň hereketleri we gürrüňindäki detallaryň sany esasy aýratynlyklar boldy. Homenkonyň sözlerine görä, teleşüweleňlerde öwredilen we 88% takyklygy bilen işleýän daşary ýurt algoritmlerinden tapawutlylykda, rus usuly tebigy maglumatlara daýanýar.
Işläp düzüjiler dili, ýüz keşbini we yşaratlary awtomatiki derňemek üçin maşyn öwredilişini ulanmak arkaly programma-apparat üpjünçiligi toplumyny döretmegi meýilleşdirýärler. Awtorlaryň pikirine görä, tehnologiýa psihologiýada, adam resurslaryny öwrenmekde we kriminalistikada ulanylyp bilner.
