Ekologlaryň maglumatlaryna görä, kolokolo pişigi (Leopardus munoai) pişikler maşgalasyndan bolan ýyrtyjy süýdemdiriji bolup, oňa ýok bolup gitmek howpy abanýar. Dünýäde bu görnüşiň, takmynan, 100 sanysy galyp, olaryň ählisi Braziliýanyň günortasyndaky, Urugwaýdaky we Argentinanyň demirgazyk-gündogaryndaky otly düzlüklerde ýaşaýar diýip, Naked Science ýazýar.
Braziliýanyň Pró-Carnívoros daşky gurşawy goraýyş guramasynyň ekologlary gyssagly çäre görülmese, kolokolo pişikleri ýakyn 5-10 ýylyň içinde ýok bolup gider diýip hasaplaýarlar. Oba hojalygynyň ýerleriniň giňeldilmegi we iri şahly mallaryň baş sanynyň ýokary depginde artdyrylmagy sebäpli agzalan pişikleriň ýaşaýan ýerleriniň ýitmegi olara esasy howp bolup durýar.Braziliýanyň taryhynda iň erbet tebigy hadysalaryň birine öwrülen, Riu-Grandi-du-Sul şäherinde bolup geçen suw joşmasynyň duýdansyz ýagdaýda bu haýwanlary goramak boýunça edilýän ähli tagallalary puja çykarandygy bellendi. Tebigy betbagtçylyk wagtynda ştat boýunça haýwanlara gözegçilik etmek üçin oturdylan 60 kamera duzagyna çynlakaý zeper ýetdi.
Halas ediş meýilnamalarynda pişikleriň ýaşaýan üç ýurdunda tebigaty goraýyş bileleşigini döretmek, ýerli uniwersitetlere we mekdeplere bilim saparlaryny amala aşyrmak, döwlet wekilleri bilen duşuşyklar göz öňünde tutulýar. Häzirki wagtda kolokolo pişiklerini emeli usulda köpeltmek mümkinçiligi göz öňünde tutulýar, ýöne bu babatda Urugwaýda geçirilen öňki synanyşyklar şowsuz bolupdy.
