Alymlar ABŞ-nyň demirgazyk-gündogar kenarýakasynda Atlantik ummanynyň aşagyndan süýji suwuň ägirt uly howdanyny tapdylar. Bu barada üç aýlyk ekspedisiýany tamamlan halkara barlagçylar toparyna salgylanýan CNN habar berdi.
Gürrüň Nýu-Jersiden Men ştatynyň demirgazygyna çenli ýaýylyp gidýän suwly gözýetim barada gidýär. “Ekspedisiýa 501-iň" çäklerinde 400 metre çenli çuňlukdaky guýular burawlandy. Seljermeler suwuň maslahat berilýän agyz suwunyň standartlaryna laýyk gelýändigini görkezdi. Hünärmenler bu suw ätiýaçlyklaryň Nýu-Ýork şäheri ýaly megapolisi 800 ýyllap suw bilen üpjün etmäge ýetjekdigini çaklaýarlar.
BMG-niň çaklamalaryny göz öňünde tutsaň, mesele has ýiti görünýär. Bäş ýylyň içinde dünýäde süýji suwa bolan isleg 40% artyp biler. Şol bir wagtda deňiz derejesi ýokarlanýar, kenarýaka suw çeşmelerini hapalaýar, senagatda suwuň sarp edilişi bolsa ýokarlanýar.
Alymlar entek üsti açylan suwuň gelip çykyşyny we ýaşyny kesgitlemeli. Bu bolsa çeşmäniň täzelenip bilinjekdigini ýa-da ýokdugyny kesgitlär. Şeýle hem, howpsuzlyk meselesi we tapyndynyň bahasy, iň esasysy hem daşky gurşaw töwekgelçiligi bilen baglanyşykly meseleler hem açyklygyna galýar.
Hünärmenler şuňa meňzeş suw gorlarynyň beýleki yklymlaryň kenarlarynda hem bolup biljekdigini we global süýji suw ýetmezçiligi meselesini çözmek üçin täze mümkinçilikleri açýandygyny aýdýarlar.
