Dallasdaky Tehas uniwersitetiniň (UTD) we Seulyň milli uniwersitetiniň (SNU) barlagçylary teragers tolkunlary arkaly diwarlaryň aňyrsyny görüp bilýän kiçijik çip döretdiler. Ol kiçijik bolansoň, smartfona-da ýerleşýär diýip, New Atlas ýazýar.
200-400 GGs ýygylykda işleýän täze çip zyýanly rentgen şöhlelerini ulanmaýar-da, adamlar üçin howpsuz teragers tolkunlaryny döredýär. Bu tolkunlar karton, gips we plastmassa ýaly, käbir materiallara aralaşyp, olaryň aňyrsyndaky zatlary görkezip bilýär. Şöhlelendirilen signal soňra çip tarapyndan tutulýar we şekile öwrülýär.
“Bu tehnologiýa Supermeniň rentgen görşüne meňzeýär. Elbetde, biz zyýanly rentgen şöhleleriniň ýerine 200-400 gigagers ýygylykdaky signallary ulanýarys "-diýip, barlagyň awtorlaryndan biri, UTD-nyň elektrotehnika ugrundan professory we Tehasyň Öňdebaryjy tejribe analog merkeziniň (TxACE) müdiri Kennet O belleýär.
Şekiliň durulygy entek pes, ýöne alymlar ony gowulaşdyrmagyň üstünde eýýäm işläp ýörler.
Alymlar smartfona ýerleşdirilen mikroçip-skaneriniň diwarlaryň aňyrsyndaky taýajyklary we pürslerini tapmakdan başlap, turbanyň çat açan ýerlerine we bukjalarydyr torbalaryň içindäkileri kesgitlemek ýaly, dürli çylşyrymly bolmadyk meselelerde peýdaly boljakdygyna umyt baglaýarlar. Şeýle hem lukmançylykda peýdaly bolup biljekdigine ynanýarlar.
