Kaliforniýanyň Figure startapy uniwersal Helix AI emeli aň modeli täzeledi, munuň netijesinde Figure 02 gumanoid roboty täze başarnygy - gap-gaç ýuwýan maşyna gap-gaçlary seresaplylyk bilen ýerleşdirmegi öwrendi. Işläp düzüjilere aýratyn algoritmleri döretmek gerek bolmady: robot bar bolan modeliň mümkinçiliklerini giňeldip, täze maglumatlar boýunça tälim aldy.
Figure 02 indi edil adam ýaly seresaplylyk bilen hereket edýär, tabaklary we bulgurlary maşynyň içine gyradeň ýerleşdirýär. Esasy kynçylyk döwülegen zatlary dogry tutup, olary zeper ýetmez ýaly ýerleşdirmekdi. Helix AI-iň kömegi bilen robot hereketleriniň dürslügini ýokarlandyrýar we gap-gaç nädogry goýlan halatynda olaryň ýerleşişini özbaşdak düzedip bilýär.
Ozal her täze wezipe aýratyn programmany talap edýärdi. Uniwersal Helix AI modeli robotyň adamyň hereketlerine syn edip, öwrenmegine mümkinçilik berýär. Şeýlelik bilen, Figure 02 eýýäm beýleki hojalyk işlerini - süpürgiçleri eplemekden başlap, konweýerdäki zatlary sortlamaklyga çenli ýerine ýetirmegi öwrendi.
2025-nji ýylyň fewral aýynda Figure Helix AI-i robotyň hereketlerine gözegçilik etmek üçin ähliumumy gural hökmünde hödürledi. Şondan bäri Figure 02 yzygiderli ýagdaýda täze hünärleri ele alýar. Iýul aýynda kompaniýa kir ýuwujy maşyna eşik salýan roboty görkezdi. Indi robotlaryň mümkinçilikleriniň sanawyna gap-gaçlar bilen iş salyşmak başarnygy hem goşuldy we ony öýde hakyky kömekçi bolmaklyga hasam golaýlaşdyrdy.
