“Türkmenaragatnaşyk” agentligi 5G tehnologiýasynyň aýratynlyklaryny we tehniki häsiýetnamalaryny öwrener. Bu barada anna güni geçirilen Hökümet mejlisinde Ministrler Kabinetiniň ýanyndaky Ulag we kommunikasiýalar agentliginiň Baş direktory M.Çakyýew hasabat berdi.
M.Çakyýewiň belleýşi ýaly, 4G tehnologiýasy bilen deňeşdirilende, 5G tehnologiýasynyň maglumat geçirijiligi 10 essä çenli ýokarydyr. Ol ygtybarly we durnukly birikmeleri üpjün edýär. Şu nukdaýnazardan bu tehnologiýanyň aýratynlyklaryny we tehniki häsiýetnamalaryny öwrenmegiň maksadalaýyk bolup durýandygy barada habar berildi we döwlet Baştutanynyň garamagyna “Türkmenaragatnaşyk” agentliginiň bu ugurda degişli işleri geçirmek baradaky teklibi hödürlenildi.
Serdar Berdimuhamedow häzirki wagtda daşary ýurtlarda döwrebap 5G tehnologiýasynyň giňden ulanylýandygyny belläp, bu teklibi goldaýandygyny aýtdy we Agentligiň ýolbaşçysyna şol tehnologiýanyň mümkinçiliklerini we aýratynlyklaryny öwrenmek boýunça degişli işleri geçirmegi tabşyrdy.
