Afrikadaky piller biri-birleri üçin özboluşly atlary oýlap tapyp, şolara seslenýärler. Bu barada Nature Ecology & Evolution žurnalynda çap edilen täze ylmy gözlegde aýdylýar.
Kornell uniwersitetiniň gözlegçileri muny Keniýanyň milli seýilgählerinde pilleriň ses ýazgylaryny seljermek we maşyn bilimini ulanmak arkaly anykladylar.
Seljerme pilleriň beýleki piller üçin at hökmünde hyzmat edip biljek belli bir ses kombinasiýalaryny ulanýandygyny görkezdi. Ses maglumatlaryna esaslanyp, kompýuter modeli 28% ýagdaýda haýsy pile ýüzlenilýändigini öňünden çaklamagy başardy.
Alymlar öz netijelerini tassyklamak üçin ýazgylary pillere aýratynlykda eşitdirdiler. Piller öz “atlary” bolan ýazgylary eşidip, beýlekilere gönükdirilen ýazgylara garanda has işjeň reaksiýany görkezdiler.
Ylmy gözlegiň awtory, Kornell uniwersitetiniň biology Mikki Pardo pilleriň hem adamlar ýaly atlary ulanýandygyny, ýöne munuň hemme ýüzlenme ýagdaýynda bolmazlygynyň mümkindigini belledi.
Alymlaryň pikiriçe, bu ukyp pilleriň ýokary sosial gurluşy we olaryň ösen kognitiw ukyplary bilen baglanyşykly bolmaly.
