Ýakynda awtoulaglary şahadatnamalaşdyrmakda ulanylan maglumatlaryň galplaşdyrylmagy bilen bagly gozgalan iş Toyota konserniniň maliýe ýagdaýyna ýaramaz täsir etdi. CNBC-niň hasaby boýunça, ýapon awtoöndürijisiniň kapitalizasiýasy 15,6 mlrd dollar peseldi.
Toyota-nyň paýnamalary 5,4% arzanlady, bu hem kompaniýanyň bazar bahasynyň 2,45 trln ýena azalmagyna getirdi. Bahalaryň şeýle peselişi synag netijelerini galplaşdyrmakda üsti açylan beýleki öndürijilerde hem hasaba alyndy. Mazda-nyň paýnamalary 7,7%, Honda-nyň paýnamalary 5,8% arzanlady. Sähel pese gaçyş Yamaha we Suzuki kompaniýalarynyň paýnamalaryna-da täsir etdi.
Duşenbe güni, 10-njy iýunda kompaniýalaryň ählisiniň paýnamalary birneme ösüşi görkezdi. Neşiriň maglumatlaryna görä, wakanyň ýaramaz täsiri tükenen bolsa gerek.
Ýaponiýanyň Ulag ministrligi derňew işini tamamlap, Toyota, Mazda we Yamaha kompaniýalaryna birnäçe awtomobilleriň we motosiklleriň satuwyny togtatmagy tabşyrdy. Umuman alanyňda, täze şahadatnamalaşdyryşdan öň alty model satuwdan aýryldy. Satuw gadaganlygy Honda we Suzuki kompaniýalaryna täsir etmedi.
