Madridiň “Realy” öz saýtynda 2025-nji ýylda ABŞ-da 32 toparyň gatnaşmagynda geçiriljek Klublaýyn dünýä çempionatyna gatnaşýandygyny resmi taýdan tassyklady.
Öň, “Il Giornale” neşiri toparyň baş tälimçisi Karlo Ançelottiniň pul baýragynyň azdygy – 20 mln ýewrodygy sebäpli klubuň ýaryşa gatnaşmakdan ýüz öwrüp biljekdigini aýtdy.
Klubuň beýanynda “Realyň” ýaryşa gatnaşmagynyň hiç haçan şübheli bolmandygy we toparyň ýaryşa uly höwes bilen taýýarlyk görýändigi aýdylýar.
Ançelottiniň özi sözleriniň nädogry düşündirilendigini aýtdy.
“Il Giornale bilen söhbetdeşlikde meniň FIFA-nyň Klublaýyn dünýä çempionaty baradaky sözlerim göz öňünde tutuşymdan başgaça düşündirildi. Esasy titullar ugrundaky göreşi dowam etdirmek üçin gowy mümkinçilik hasaplanýan ýaryşda oýnamakdan ýüz öwürmekden başga hiç zat meniň bähbidime ters gelmeýär” – diýip, italiýaly hünärmen X sosial ulgamynda ýazdy.
Ýatlap geçsek, 2025-nji ýylyň Klublaýyn dünýä çempionatyna Ýewropadan 12 topar gatnaşar: “Mançester Siti”, “Çelsi” (ikisi-de – Angliýa), “Real”, “Atletiko” (ikisi-de – Ispaniýa), “Bawariýa”, Dortmundyň “Borussiýasy” (ikisi-de – Germaniýa), “Inter”, “Ýuwentus” (ikisi-de – Italiýa), “Portu”, “Benfika” (ikisi-de – Portugaliýa), “PSŽ” (Fransiýa) we “Zalsburg” (Awstriýa).
