Alymlara gadymy Müsüriň “azatlyk ugrunda göreşiji” diýen at alan söweşjeň şasy Sekenenra Taa II-niň ýüz keşbini täzeden dikeltmek başartdy. The Sun gazetiniň berýän habaryna görä, ol giksoslar bilen bolan söweşde, Müsüri azat etmek ugrundaky göreşde wepat bolupdyr.
Sekenenra Tao II, takmynan, b.e. öňki 1569-1554-nji ýyllarda höküm sürüpdir.
Barlagçylar patyşanyň mumiýasyny öwrendiler we söweşde kellesinden ýaraly bolup ölendigini anykladylar.
Flinders uniwersitetiniň arheology Maýkl Habiht: "Balzamlaýjylar ellerinden gelenini edipdirler, ýöne Sekenenranyň ýüz keşbi beýleki şalaryň mumiýalaryndan düýpgöter tapawutlanýar, ol ellerini gursagynda gowşuryp rahat ýagdaýda ýatyr" –diýip gürrüň berýär.
Faraonyň daş keşbini täzeden dikeltmek işi 130 ýyldan gowrak wagtap geçirilen gözlegleriň dowamynda toplanan maglumatlary ulanan braziliýaly 3D dizaýneri Sisero Morais tarapyndan amala aşyryldy. Netije gaty takyk boldy, ýöne patyşanyň derisiniň reňki ýaly, käbir jikme-jiklikler jedelli bolmagynda galýar.
Gözlegleriň netijesinde Sekenenranyň uzyn boýly, syratly adam bolandygy belli boldy. Egnindäki we döşündäki myşsalaryň galyndylary onuň diýseň gujurly bolandygyna şaýatlyk edýär. Faraon, megerem, 40 ýaşynda wepat bolan bolsa gerek.
Mundan ozal alymlar Müsüriň iň baý faraony Amenhotep III-iň daş keşbini täzeden dikeldipdiler. Ol Tutanhamonyň atasy bolupdyr.
