Apple 10-njy iýunda başlajak WWDC konferensiýasynda macOS operasion ulgamyna täzelenme hödürlär. Bloomberg-iň synçysy Mark Gurmanyň maglumatyna görä, bu üýtgeşmeler ilkinji nobatda has sazlaşykly we ulanmagy aňsat boljak “Ulgam sazlamalarynyň” interfeýsine täsir eder.
Şeýle hem macOS 15-iň sazlamalaryndaky gözleg gowulandyrylar we Hatlar, Poçta, Suratlar programmalaryna we dolandyryş merkezine täze funksiýalar goşular.
WWDC-de, macOS-dan başga-da, iOS 18, iPadOS, watchOS we tvOS täzelenmeleri hödürlener. iOS 18-de Siri, Suratlar, Hatlar, Bellikler we Safari brauzeri ýaly dürli programmalarda we funksiýalarda ulanyljak emeli intellektiň çuňňur integrasiýasy bolar diýlip garaşylýar.
Siri ses kömekçisi adamyň hereketlerini seljerer we käbir meseleleri aňsatlaşdyrar. Mysal üçin, ulanyjylar elektron haty pozmagy, suraty redaktirlemegi ýa-da ýygnagy jemlemegi buýrup bilerler.
Hatlara täze emojiler we Tapback nyşanlary goşular we tekstde aýratyn sözleri janlandyrmak funksiýasy hem bolar.
iOS-daky Dolandyryş merkezinde täzelenen aýdym wijeti we “akylly” öý enjamlaryny dolandyrmak mümkinçilikleri bolar.
