6-njy iýunda Türkmenistanyň milli futbol ýygyndysy myhmançylykda Özbegistanyň milli ýygyndysyndan utuldy. Dünýä çempionaty – 2026-nyň saýlama ýaryşynyň çäklerinde bolan oýun Daşkentdäki “Milliý” stadionynda geçirilip, 3:1 hasabynda tamamlandy.
Ýer eýeleri 17-nji minutda Husniddin Alikulowyň (“Rizespor”) goly netijesinde öňe saýlandylar. Türkmen topary 25-nji minutda hasaby deňledi, gol bilen “Arkadag” FK-nyň ýarym goragçysy Şanazar Tirkişow tapawutlandy. Ýöne dört minutdan Eýranyň “Persopolis” topary üçin çykyş edýän Özbegistanyň milli ýygyndysynyň ýarym goragçysy Oston Urunow toparyny ýene-de öňe çykardy. Oýnuň 70-nji minutynda Özbegistanyň milli ýygyndysynyň goragçysy Şerzod Nasrullaýew (“Nasaf”) gutarnykly hasaby kesgitledi.
Türkmenistanyň milli ýygyndysy indiki oýnuny 11-nji iýunda öz meýdançasynda Gonkonga garşy geçirer.
