Roskosmos kosmonawtlar toparynyň komandiri, Halkara kosmos stansiýasynda TASS-yň ýörite habarçysy, Türkmenistanyň Gahrymany Oleg Kononenko Ýere golaý orbitada jemi 1000 gije-gündizi geçiren dünýäde ilkinji adam boldy. Bu barada Roskosmosa salgylanyp, TASS habar berýär.
“Şu gün Moskwa wagty bilen 00:00:20-de Halkara kosmos stansiýasynda işleýän “Roskosmos” döwlet korporasiýasynyň kosmonawty Oleg Kononenko dünýäde ilkinji gezek kosmos uçuşlarynyň umumy dowamlylygyny 1 müň gije-gündize ýetirdi” – diýlip, habarda aýdylýar.
Kosmonawtlar toparynyň komandiri häzir karýerasynda bäşinji kosmos uçuşyny amala aşyrýar. Ol 4-nji fewralda bäş missiýasynyň dowamynda (1998-nji ýyldan 2015-nji ýyl aralygy) kosmosda jemi 878 gün 11 sagat 29 minut 48 sekunt bolan russiýaly kosmonawt Gennadiý Padalkanyň rekordyny täzeledi. Iýun aýynda Kononenko kosmosda 60 ýaşyny bellär, ýyllyk ekspedisiýanyň ahyrynda bolsa onuň umumy uçuşy 1 110 güne deň bolar.
