Amerikan studiýasy Fable emeli aň tarapyndan döredilen seriallary hödürleýän Showrunner striming hyzmatyny işe girizdi. Bu barada The Hollywood Reporter habar berýär.
Platforma diňe bir taýýar taslamalara tomaşa etmäge däl, eýsem täze taslamalary döretmek işine gatnaşmaga-da mümkinçilik berýär. Tomaşaçylar özleri üçin özboluşly epizodlary döredip, sýužete täsir edip bilerler.
Geljekde Showrunner interaktiw seriallary döretmek mümkinçiligini hödürlär we awtorlar öz döredijiliginden gazanç edip bilerler.
“Maksat emeli aň pudagynda Netflix bolmakdyr. Ähtimal, siz filmiň ähli epizodlaryna tomaşa edip gutararsyňyz we ýene bir bölümi döretmek üçin düwmä basarsyňyz. Siz onuň näme barada bolmalydygyny aýdyp bilersiňiz ýa-da emeli aňyň hemme zady etmegine rugsat berip bilersiňiz” – diýip, Fable-niň ýerine ýetiriji müdiri Edward Saatçi belledi.
Häzir platformada 10 animasion taslama, şol sanda “Exit Valley” satirasy, “Ikiru Shinu” horrory we “Sim Francisco” antologiýasy bar.
Fable 2019-njy ýylda interaktiw mediada innowasiýa üçin “Emmi” baýragyna mynasyp boldy. Studiýa emeli aňyň kömegi bilen “Günorta seýilgähiň” dokuz gysga bölümini döredeninden soň belli boldy.
Eýýäm häzir özüňi seriallaryň awtory hökmünde synap görmek bolar: Showrunner synaga gatnaşmak isleýänleri hasaba alýar.
