Apple TV+ “Dynç” (Отпуск по обмену / The Holiday) romantiki komediýasynyň äheňinde mini-serial çykarar diýip, Variety habar berýär.
Hakyky film ýaly, serial iki aýal – Roždestwo wagty öýlerini çalşyp, garaşylmadyk ýagdaýda öz söýgüsini tapýan britaniýaly we amerikaly aýal barada gürrüň berer.
Serialda ilkinji filmde bolmadyk täze gahrymanlar peýda bolar. Ssenariniň üstünde Krissi Daker we Rob Delani işleýär. Daker ýerine ýetiriji prodýuser hökmünde-de çykyş eder. Önümçilik bilen Left Bank Pictures kompaniýasy meşgullanar.
Häzirki wagtda baş keşpler üçin aktýorlar gözlenýär. Ilkinji filmiň režissýory Nensi Maýers taslama gatnaşmaýar.
“Dynç” filmi 2006-njy ýylda çykdy. Onda baş keşpleri Keýt Uinslet, Kemeron Dias, Jud Lou we Jek Blek ýerine ýetirdi. Uinslet londonly žurnalist Aýrisi, Dias bolsa Los-Anjelesdäki kompaniýanyň eýesi Amandany oýnady.
Film prokatda dünýä boýunça 205 mln dollardan gowrak ýygnap, üstünlikli boldy. 2024-nji ýylda Jud Lou filmiň dowamynyň bolup biljekdigine yşarat etdi.
