Massaçusets tehnologiýalar institutynyň (MIT) hünärmenleri NASA-nyň ýa-da SpaceX-iň kosmos missiýalarynyň bir bölegi bolup biljek Aý bazasynyň prototipi bolan Momo taslamasyny hödürlediler.
Momo bazasy, ary öýjügi ýaly, aýratyn “öýjüklerden” ybarat modully gurluş. Her “öýjük” germetiki polietilen membranadan ýasalan we alýumin çarçuwa bilen goralan. Çarçuwalarda magnit bar, bu bolsa birnäçe bölekden dessine bitewi jaý gurmaga mümkinçilik berýär.
Her “öýjüge” ýatalga, iş stoly ýa-da trenažor ýaly kosmos mebellerini berkidip bolýar. Bir Momo bazasynda köpünden iki kosmonawt ýerleşip biler.
Gerek bolsa binany täzeden gurup bolar ýa-da döwülse bölekleriniň birini çalt çalşyp bolar. Baza sfera ýa-da ellipsoid görnüşinde bolup biler. Şeýle gurluşyk toplumy kosmos gämilerinde daşamaga amatly, sebäbi kän ýer tutmaýar.
NASA 2026-njy ýyldan 2030-njy ýyla çenli aralykda “Artemida-3” Aý missiýasyny goýbermegi meýilleşdirýär. Bu missiýada kosmos gullugy adamlary Aýa ibermek we emeli hemranyň mundan beýläk kolonizasiýa edilmegine esas döretmek isleýär. Alymlar tarapyndan döredilen Momo bazasynyň kosmonawtlaryň ýany bilen äkidilip, olaryň Aýdaky esasy mesgenine öwrülmegi ähtimal.
