The Hollywood Reporter-yň habar bermegine görä, režissýor Stiwen Spilbergiň (“Şindleriň sanawy”, “Hatarçy Raýany halas etmek”) heniz at goýulmadyk täze filmi 2026-njy ýylyň 15-nji maýynda kinoteatrlara çykar.
Filmiň ssenarisini “Dünýäleriň söweşi”, “Ýura eýýamynyň seýilgähi” we “Indiana Jons we billur kelleçanaklar şalygy” filmlerini goýujy bilen işleşen Dewid Kepp ýazar.
Taslama Spilbergiň özüniň döreden sýužetine esaslanýan "özboluşly waka baý film" bolar. Wakalaryň jikme-jik beýany we aktýorlaryň düzümi entek aýan edilmedi. Filmiň üstünde Universal studiýasy we Amblin Entertainment işlär.
Spilbergiň soňky işi bolan “Fabelmanlar” atly terjimehal dramanyň 2022-nji ýylda çykandygyny ýatladýarys.
Spilbergiň etsem-goýsamlary köp. Häzirki wagtda ol baş keşbi Bredli Kuperiň janlandyrmagynda polisiýaly “Bullit” filminiň remeýkini çykarmaga taýýarlanýar. Şeýle hem režissýor Napoleon hakda mini-seriýaly surata düşürmek hyýalynyň bardygyny gürrüň berdi. Onsoňam Jeýms MakBraýdyň “”Asman-Zemin” azyk dükany” romanynyň esasynda film düşürer. Mundan başga-da, kinorežissýor Martin Skorseze bilen bilelikde “Gorky burny” (“Мыс страха”) trillerine esaslanýan teleserialyň üstünde işleýär. Ýanwar aýynda Apple TV +-de Spilbergiň prodýusserlik eden “Howanyň hökümdarlary” (“Властелины воздуха”) atly ýene bir seriýaly çykypdy.
